Saturday, October 18, 2008

سلموا لنا علي مصر


مودعين الأردن بعد زيارة خمسة أيام لم نستطع فيها زيارة عاصمتها عمان وحتي أقرب ضواحيها إلي مقر إقامتنا عقب ورشة عمل قاسية دعانا لها مركز الصحفيين الدوليين ICFJ في مهارات الصحافة الإستقصائية , دعانا عدد من زملاء المهنة الأردنيين إلي سهرة علي أحد المقاهي التي وصفوها بأنها ملتقي الصحفيين والمثقفين الأردنيين ورغم تشويقهم لنا من حديثهم عنها إلا أن وصف جفرا يطول ويطول , جفرا أيوه جفرا هو المقهي والذي وجدنا غالبية العاملين فيه مصرين بداية من أصغر عامل حتي مديره الذي يدرس الإعلام عن طريق النظام المفتوح بجامعة القاهرة والذي رحب بنا هو وزملاءه بشدة لم يكونوا وحدهم الذين يعملون في هذا البلد الصغير الجميل فقير الموارد ورغم ندرة حركتنا إلا أن خطواتنا القليلة فيها ارتبطت بمصريين بداية من الشاب الذي ينادي علي بيع الشاي في ميدان المسرح الروماني وحتي سمع صوت زميلنا عجم سأله أنت مصري وعندما أجابه بنعم قاله أنا من كفر الشيخ وبسرعة وكرم عزمنا علي الشاي أبو نعناع اللي بيسرح ببيعه بربع دينار وأدي حال المصريين الغلابة في هذا البلد

وكل ما نقابل حد يسأل ويسلم علي مصر حتي بائع البن في شارع قريش الذي أكرمنا بتخفيض دينار كامل في البيعة سألنا عن مصر

وفي ليلة الوداع بجفرا واحنا علي السلم لم يتركنا واحد منهم إلا وأوصانا بالسلام علي مصر آه والله بنبرة مصرية قوية وجرئية وحزينة ابقوا سلموا لنا علي مصر أد ايه الكلمة دي وجعت قلوبنا نعمل ايه تعمل فينا ما تعمل بنحبها وتوحشنا وعمرنا ما نكرها رغم انهم بعدوا عنها عشان يشتغلوا في أقل أعمال لكن لسه وحشاهم ولسه بيحبوها زي ما احنا لسه بنحبها

حنسلم لكم علي مصر ومصر في يوم من الأيام راح تناديكم

9 comments:

  1. ما أظنش
    صحيح الواحد بره هنا حيموت من الشوق إليها بس إيه اللي رماك على المر
    اللي أمر منه
    و العيشة في مصر مليانة مرار يا منعم
    و الغربة مرة
    و كله مر في مر

    ReplyDelete
  2. المشكله مش فى مصر
    المشكله فى اللى ماسكين وممشين مصر
    الله المستعان

    ReplyDelete
  3. كويس والله ان الناس دي برغم ان مصر نسيتهم هم ما نسيوهاش بس الحقيقة الناس دي سابت البلد لانها كرهت الحياة فيها يعني - زي ما بتقول - كلهم بيشتغلوا اعمال بسيطة جدا في بلد مواردها محدوة يمكن اقل من مصر كمان لكنهم مش قادرين
    حتي انهم يعيشوا كويس في بلدهم
    ولا عزاء للشعب المصري المسكين
    ودمتم

    ReplyDelete
  4. عمرنا ماننسي مصر وعمرنا ماهنحب غيرها بس ساعات بتبقي ظروف خارجه عن اراده الشخص مهما بعدنا ومهمااتغربنا هنفضل مصريين وهتفضل ارضنا ولو هيا نسيتنا عمرنا ماننساها بتجري في دمنا ....احنا من غير مصر ولا حاجه ...السلام امانه لمصر

    ReplyDelete
  5. حمدا لله على السلامة
    لم يخطئ الشاعر اذا عندما قال : مصر هى أمى

    ReplyDelete
  6. سبقني عبد المنعم وكتب ما اوصاني به عمال هذا المقهي -فسلموا علي مصر كانت وصية العديد منهم
    فلم يتركنا واحدا منهم الا واوصاني بذات الكلمة "سلمولي علي مصر " نبرة قوية حزينة نعم -ولكنها بالوقت نفسه يائسة..
    معظم العاملين بالمطعم اوصوا بوصية اخري وهي "لو فيه شغل في مصر قولولنا ...

    ReplyDelete
  7. الشعب المصري شعب ضحية نفسه

    ReplyDelete
  8. شارك في الحملة الشعبية للقيد بالجداول الانتخابية بوضع بنر الحملة علي مدونتك.
    بنر الحملة موجود علي مدونتي

    ReplyDelete
  9. والله أنا شايفة ان رب هنا رب هناك
    يعنى ماحدش قلهم يسيبوا بلدهم ويروحوا يتغربوا يبيعوا بن وشاى طب ما هنا برضوا ممكن يبيعوا أى حاجة ممكن تجيب فلوس هما اللى بيستسهلوا وأنا متأكدة من انهم بيصرفوا قد اللى بيكسبوه عشر مرات بس هى تلاكيك ومادام كدة كدة هنتعب يبقى نتعب فى بلدنا أحسن

    ReplyDelete

abdoumonem@gmail.com