Tuesday, March 4, 2008

الريس حنتيره الإنسان الرياضي


طالب السيد الرئيس حنيره الذي يتمتع بروحين روح انسانية واخري رياضية طالب سمير زاهر بضرورة التدخل لإنهاء أزمة عصام الحضري حفاظا علي تاريخه كلاعب وإنجازاته علي الصعيدين المحلي والدولي‏,‏ وخصوصا أنه قدم الكثير‏,‏ سواء للنادي الأهلي‏,‏ أو للمنتخب الوطني‏,‏ حيث كان عنصرا فعالا في الإنجاز التاريخي للمنتخب الوطني‏,

كما طالب الريس حنتيره بضرورة الكف عن الحملة العشوائية التي يتعرض لها الحارس الدولي في وسائل الإعلام المختلفة‏,‏ ووصفه بصفات لا تليق بتاريخه الكروي‏,‏ مشيرا إلي أنه من حقه الاحتراف رسميا‏,‏ بعد أن تخطي عمره‏35‏ عاما‏,‏ خصوصا أن الاحتراف هو بوابة مصر لتعبر عن نفسها في المحافل الدولية الرياضية‏,‏ خاصة في أوروبا والتعريف بالكرة المصرية‏,‏ لاسيما أن الرياضة باتت سلعة رائجة علي المستوي العالمي‏.‏

وشدد الرئيس حنتيره شوف شدد دي من حرصه ها شدد علي رئيس الاتحاد بضرورة حسم قضية الحضري خلال الساعات القليلة المقبلة‏,‏ ووعد زاهر الرئيس مبارك بحل الأزمة‏,‏ مؤكدا أن اللاعب أسهم في إنجازات مصر‏,‏ ويجب أن يتم التعامل مع الأزمة باحترافية دون الانجرار إلي العواطف والشعارات‏

فعلا والله رئيس لكل المصريين وبيكرم اللي المصريين بيحبوهم لا وبيحافظ علي تاريخ اللاعب وزعلان من شويه الصحفيين اللي بيتعرضوا للاعب

واهتمام حنتيره في الوقت ده بالذات في اعتقادي بمتابعة قضية الحضري تدل علي متابعته الحثيثة للقضايا الهامة في البلاد والوطن العربي

بينما لم نراه يشدد علي مراعاة الغلابة اللي بيوجعوا دماغ الحكومة وبيعملوا عمليات انتحارية عند طابور العيش ابو خمس قروش وبيموتوا المجرمين عشان الرغيف المدعم , والله يا ريس حنتيره البلاد معك في امان وبصراحة حزمك كمان في التعامل مع الإرهابيين بتوع الإخوان الللي عايزين يدخلوا المحليات تعامل ايه بص بصراحة يا ريس انا زعلان الحزم مجبش غير 700 معتقل بس قلبك طيب اوي يا حنتيره معهم

وانا ادركت انسانية الريس حنتيره في الوقت ده بانه يعمل علي رد اعتبار الحضري عشان يخفف علي الناس الصور المؤرفة اللي بتيجي من فلسطين والناس اللي معندهاش دم اللي بيموتوا شهداء وكمان بيلعوا صورهم في الجرانين والفضائيات

فحنتيره كرئيس بيخاف علي مشاعر شعبه قرر يخفف همهم بالاسكتش العظيم اللي عمله مع الحضري

ويلا ارقص يا حنتيره والعب يا حضري ولا عزاء لاي حاجة في الدنيا
قمت من نومي اليوم علي اتصال من الأم العزيزة ام صديقي معاذ وزوجة رجل الأعمال حسن مالك المحال للقضاء العسكري وهي تصرخ كمدا وغضبا من اهتمام الريس بقضية الحضري بينما الفقراء يتضرون جوعا والأبرياء يعيشون افضل ايامهم في سجون سعادته , عذرا يا امي ولكن الله بصير بحالنا واحسن الظن به انه سينتقم لنا من الظالمين قولي معي حسبنا الله ونعم الوكيل

11 comments:

  1. يا عم كويس انه مهتم بحاجة وانه بيتدخل في حاجة مش مُضرة
    خليه يتدخل في الكورة ويفتي فيها بدل ما يفتي في غيرها احسن عم حسني فتيه من النوع المدمرررر

    ReplyDelete
  2. اولا في الاغلب هذه تعليمات فريق العلاقات العامة للرئيس الذي يعتقد ان هذا يحسن صورته امام الشعب ...
    ثانيا .. يا عزيزي تفاهة اهتمامات الرئيس تأخذ مركز الصدارة منذ فترة .. ايام المؤتمر الاسلامي حضر 30 دقيقة فقط وتاني يوم ذهب لمشاهدة كسوف الشمس ف مرسى مطوح ومانكسفش هو على دمه وهو لسه معتذر عن حضور القمة العربية لظروف صحية
    وبعد غرق العبارة خد العائلة الكريمة(اللي هي وش المجتمع) وراح يحضر كاس الامم الافريقية وتقريبا ما كلفش نفسه يزور ضحايا الحادث
    ده غير سهره كل يوم قدام البامج اللي زي القاهرة اليوم ومداخلاته التليفونية بنفسه
    دي غالبا انشطة الرئيس اليومية فيما عدا ذلك غهو بيتشمس باقي اليوم
    حكم السن بقى .. وربنا برضه على التافهين

    ReplyDelete
  3. وما الدنيا الا حلة ملوخية كبيرة

    ReplyDelete
  4. سمعنايا ريس حنتيرة
    سمعنا يا ريس حنتيرة

    حتمشي كده على طول على طول
    لحد ما تلاقي جماعه
    لحد ما تلاقي جماعه

    تقبض عليها علطول علطول
    و تجيب لشعبي مجاعه
    و تجيب لشعبي مجاعه

    ReplyDelete
  5. يا جماعه حاجه من اتنين
    يا أما الريس مش بيتفرج إلا على اخر حته فى النشره بتاعت الكوره لما جمال ابنه ينادى عليه ويقولوا بابى الرياضه

    وطبعا كده مش مهتم إلا باللعيبه

    يا أما الريس بقى ماشى ورا بتوع العلاقات العامه زى ما حنه قالت

    فى الحالتين
    نحن انصار الشعب المنهوب المسلوب
    مازلنا نضرب من الامن
    والمخبريين
    لازلنا نعانى فى طوابير العيش
    لازلنا فى المعتقلات بالعشرات وقريب حتوصل مئات

    وياريت يا عم عبد المنعم لما تشوفى تسلملى عليه
    وتقوله انت مش احسن من الى هربوا من مصر وغرقوا
    سلامات
    نادر الخطاب

    ReplyDelete
  6. سايب الناس بتموت فى غزو ومهتم بالكورة !!

    حسبى الله ونعم الوكيل

    ReplyDelete
  7. خضري ابواسكندرMarch 5, 2008 at 12:59 AM

    الراجل ده يا غما اهبل يا اما بيستهبل ...

    ReplyDelete
  8. ليس هكذا يكتب الاخوان

    ReplyDelete
  9. غاوي حرية يقول...
    يا أستاذ منعم انت ليه متحامل ع الرئيس بتاعنا كده وحكومته شايفه شغلها كويس ضرب وقتل وتشريد واعتقال وفتح سجون جدية لتعطي كل صاحب رسالة رسالة انه لو فتحت فمك بكلمة فيها اصلاح او تكلمت لاصلاح المجتمع فمكانك بالتأكيد محجوز لدى مقار امن الدولة وبالتالي قرار اعتقالك موجود وممضي وجاهز كمان فاضل بس اسمك عليه ورقم تتنادى بيه وبعد كده تقعدلك يومين من غير شمس وبعد كده تترحل على ايا من المعتقلات .. ايه رأيك بزمتكم في احسن من كده .. وبعدين لقد قالها رئيسنا المبجل - ربنا يهديه - أنه لن تجوع غزة وصدق في قوله لكنه عزم ان تموت غزة ولا عزاء بعد ذلك في اي انسان مسلم على وجه الاراضي العربية ... ولكن لا نملك الا ان نقول حسبي الله تعالى ونعم الوكيل وعزاؤنا الوحيد ان أخره جنة ... وربنا يكون في عون اخوانا في حماس .. وفي النهاية أسف اني اكون قد أثقلت عليك بهذه الكلمات وأدعوك لزيارة مدونتي غاوي حرية

    ReplyDelete
  10. حنتيره مين يا عم حرام عليك انتا مشبعتش أقسام خاف علي نفسك وبعدين ده رئيسنا المبجل يعمل ال يعمله

    ReplyDelete
  11. يااستاذ منعم انتم مبيعجبكوش حاجه خالص كتر خيره الريس حنتيره انه افتكر الحضرى فى الشويه اللى بيفوق فيهم بفضل المقويات والزئبق الاحمر وانا ابايع الريس حنتيره رئيسا مدى الحياه لجمهوريه مصر الكرويه ونشوف احنا رئيس لجمهوريه مصر العربيه ولنا الله

    ReplyDelete

abdoumonem@gmail.com