Friday, June 29, 2007

أحمد شريف مش اخوان

أرسل لي أحمد شريف هذا الفيديو اهداء لي معبرا عن رؤيته وانتمائه لمصر ورؤيته للمجتمع الذي لابد أن تتنوع اشكاله وأفكاره
أحمد قال كده مينفش المجتمع ده لون ......اتفرجوا انتوا بأه

توضيح يبدو ان كل تدويناتي بعد نزولها لازم يصاحبها توضيح اولا انا حطيت الفيديو مش عشان هو اهداء واللي عامله اظن ميقصدش انه هدية لكن اظني انه بيهدي وجهة نظره وطالب مني التعليق عليها فانا رايت أني احطه علي المدونة عشان نعلق كلنا ومادمت بوضح انا ححط أسئلةعايزين نرد كلنا عليهم بس في مش شكل هجومي ولا عدائي علي شريف لانه هو بيحب روبي وعادل امام واحنا مش بنحبهم لكن عايزين نوضح دور الاخوان كحركة اصلاحية في كافة المجالات

هل احنا فعلا بنوصل للمجتمع بكل شرائحه

ايه اللي بيوصل المجتمع مننا

هل احنا بنجبر حد علي أن يصبغ بصغتنا الاسلامية

51 comments:

  1. مش فاهم والله يا منعم إنت ليه حطيت الفيديو ده؟
    هل أنت متفق مع الفيديو أن لإخوان أصحاب لون واحد لايستوعب الطيف المجتمعي بأشكاله وألوانه؟

    أم أنك وضعت الفيديو حرجاً لأنه أهداء لك كما قلت؟

    أم أنك تريدنا أن نعلق فنشيد أو ننقد تلك الفكرة؟

    اعتقد أن الفكرة في هذا العمل حائره وهذا ألطف لفظ استطعت أن أقوله

    فخلط الأوراق بهذه الطريقة عجيب
    وعلاقة المقدمات المضطربه بالنتيجة النهائية بها قدر كبير من الظلم والتعسف

    الأتمني أن تقول لي ماذا أردت أن تقول بنشر هذا الفيديو

    ReplyDelete
  2. انا معاه تماما ان كل دول مينفعوش يبقوا اخوان0
    بس ياستاذ منعم ده بالظبط ترسيخ لمعني الدوله العالمانية يعني ايه البنت اللي اللي تسلم عليها تقول هاي ولا عشان ميزعلكش جابلك المنقبة ودول عيشين ودول عيشين وقضيها وخلاص0
    وايه عادل امام اللي جايبهدا كمان وروبي وقضيها وخلاص 0
    من الاخر اعتقد ان الكليب الصغير ده هو تصغير لمعني دوله علمانية مصريه الرقصات والعري جنب النقاب والدعاة بجميع اطيافهم مش اخوان بس جنب عادل امام وروبي وعمرو دياب0
    اللي انت ازاي بالله عليك ناس بتربي وبتصلح وناس تانية بتهدم اخلاقيات ومبادئ دينية0
    في الاخر محدش قال ان كل دول لازم يبقوا لون الاخوان لكن كل دول واجب عليهم انهم يبقوا مسلمين بحق مش اسلام الاهواء والمزاج ،بالمناسبة دي كان فيه رقاصة بيسالوها في التليفزيون علي الرقص وكده قالت (وفيها ايه انا كده بدخل السرور علي قلب مسلم وده من اعظم الاعمال)0
    الاستاذ اللي عمل الكليب ده بيعبر عن وجهة نظره البحتة وانا لااؤمن تماما بهذه الاراء0
    وطالما انا كنت من الاخوان ساحارب هذه الافكار في من اعرفهم واهدمها لهم باذن الله0
    اخوك في الله عز

    ReplyDelete
  3. عندي حاجة كمان0
    تصدق صورتك تجنن جنب روبي وعادل امام وعمرو دياب يامنعم لو موافق علي الكليب ده يبقي مبروك عليك الصورة الحلوة دي وماتنساش ياستاذنا تحطها في المقدمة بتاعة المدونة0
    ملوحوظة (ده لوانت موافق علي الكليب)0اخوك في الله عز

    ReplyDelete
  4. انا مش عارف .

    المفروض ان حضرتك توضح وجهه نظرك يمكن الواحد بيها هيفهم الفيديو بطريقة تانية ..

    اما لو عاوز كل واحد يفهمها بطريته الخاصة

    فأنا اعتبر ان هذا الفيديو خطأ فادح


    وأقف مع الاخ عز فى كل كلمة قالها ..

    ReplyDelete
  5. الله عليك يا احمد ياشريف
    طول عمري بعشق دماغه و اعماله
    و انا تمااااماااااا اوافقه الرأي اللي هو رأي صحصح تماما

    و مش عارف ليه انت موضحتش رؤيتك للفيديو ؟؟؟!!!!

    ولا وجود صورتك في مصف رموز الفن و الغناء و إعتبارك رمز للتدوين بوضعه لصورتك كان سبب كاف لإعلانه ؟؟؟

    ReplyDelete
  6. مبحبش روبي و لا عمرو دياب و لا عادل إمام
    بس معنديش نية اني ألونهم بلوني
    و لا أجبرهم انهم يكونوا زيي

    بس عايز أقول للناس متتلونش بلونهم
    لاني مسلم باخاف ربنا و باكره معصيته و احب ان كل الناس تدخل الجنة

    أنا إخوان

    ReplyDelete
  7. اعد التفكير يا عبد المنعم

    ReplyDelete
  8. انا بالطبع لا اتفق مع ماهو موجود في الكليب لكن ليه الهجوم على الاخ عبد المنعم هو كان لازم يعرض الفيديو لانه اهداء كما قال واكيد هو صادق و كمان مكنش ينفع يقول رايه ايا كان كيلا يؤثر في اراء الاخرين


    وعلى فكره انا بقول الكلام ده رغم اختلافي مع كثير من مواقف الاخ عبد المنعم في نفس الوقت اللي بحترمه فيه جدا و بحب جوانب كتيره في شخصيته واتضايق من اشياء اخرى وهذا هو الاختلاف المسموح بيه لكن المزج اللي ملوش طعم ده مينفعش لاني منفعش اكون كل دول ولو انا واحد منهم لايمكن اكون التاني

    و في كلمه احب اوجهها لاخينا في الله اللي عمل الكليب انه هدف الاخوان اسلمة الحياة البشرية يعني نعيش بما يرضي الله مش شرط كل البنات تتحجب لكن على الاقل يوصلها الخطاب الديني وتعرف دينها صح وتختار و مش عايزين كل الناس مسلمين لا بالعكس بس كمان نعامل الاطياف الاخرى كل الاديان التانيه بما يرضي الله وزي مالالاسلام علمنا لان الاسلام الدين الوحيد اللي ممكن يستوعب كل الاديان الاخرى بل و يحط لها تشريعات واحكام

    واكيد مش عايزين كل المجتمع اخوان ياسيدي احنا كاخوان همنا نصلح حال مجتمعنا و ناخد بايد الناس اللي احنا شايفين انهم محتاجين يعرفوا شيء مغيب عنهم ووقت مايعرفوه هما احرار في اختيارتهم


    وكلمه بقى للاخ منعم وهقولها ورزقي على الله وهبعتها كمان على الايميل بتاعه

    يااخ عبد المنعم حضرتك عامل المدونه علشان تتواصل مع الناس مينفعش حضرتك تطرح الموضوع وتغيب تغيب على موضوع جديد لو حضرتك عايز كده كان ممكن تعمل موقع و تعمل موضوعات مغلقه مش مدونه للحوار وياريت حضرتك تراجع كام تعليق جه لحضرتك وكام استفسار وحضرتك مرديتش بالتاكيد حضرتك مشغول جدا ووالله انا مقدره ده لكن كمان لازم حضرتك تقدر كلامي مش لاني اللي بقوله والله يااخي انا لست الا صفرا على اليسار جنب كتيييييير اوي وحضرتك منهم بس انا مش عايزه حاجه تتاخد على حضرتك و مش بحب ادايق من حاجه ومقولهاش وبس

    ReplyDelete
  9. انت يقيت تحط حاجات غريبه اوي يا عبد المنعم
    s
    hamsawy.blogspot.com

    ReplyDelete
  10. توضيح يبدو ان كل تدويناتي بعد نزولها لازم يصاحبها توضيح اولا انا حطيت الفيديو مش عشان هو اهداء واللي عامله اظن ميقصدش انه هدية لكن اظني انه بيهدي وجهة نظره وطالب مني التعليق عليها فانا رايت أني احطه علي المدونة عشان نعلق كلنا ومادمت بوضح انا ححط أسئلةعايزين نرد كلنا عليهم بس في مش شكل هجومي ولا عدائي علي شريف لانه هو بيحب روبي وعادل امام واحنا مش بنحبهم لكن عايزين نوضح دور الاخوان كحركة اصلاحية في كافة المجالات

    هل احنا فعلا بنوصل للمجتمع بكر شرائحه

    ايه اللي بيوصل المجتمع مننا

    هل احنا بنجبر حد علي أن يصبغ بصغتنا الاسلامية

    ReplyDelete
  11. الاخت دعوة الفردوس
    اوا شكرا لاهتمامك باني اوضح الامر بس انا فعلا بقرأ كل التعليقات اللي توصل مهما كانت كبيرة وطويلة ومهما كانت بتسئ لشخصي رغم اني بأعرض أراء وأفكار
    وانا وضحت انا ليه حاطط الفيديو ده اللي هو بعته مش عشان هو فيه صورتي وهدية ده شخص بيفكر حب يعرض وجهة نظره وطلب رأيي بس بشك جديد فانا قررت ان الجميع يشارك في الرد بس يبدو كان ازم اكتب التوضيح للاسف عشان الناس متقولش عليا وحش والحاجات الغريبة اللي بيقولها دي بس ربنا يسامحم
    علي فكرة انا باخد كل التعليقات وبقعد أقراها كتييييييييييييير جدا وبقعد احللها كمان ,
    فانا ارحب بكل الاراء ولو مخالفة لكن انا كانسان بيزعلني جدا ان التعليقات تمس شخصي
    جزاكي الله خيرا علي هذا الحرص لذلك انا عملتك رد مخصوص وحطته علي المدونة برده وبعته علي الميل بتاعك

    ReplyDelete
  12. هو حضرتك يا استاذنا نزلت الفيديو ده
    عشان ندخل نقول ان ده مميصحش يعنى .. وان الاخوان هيستوعبوا اللكل
    وممكن يبقوا كلهم لون واحد

    ولا منزله عشان نعيد تفكيرنا فى الاخوان ..واللون بتاعهم

    ولا عشان الاخوان يغيروا طريقتهم .. وينسوا حكاية انهم لون واحد مع الشعب المصرى

    مش فاهم .. ايه الهدف من الفيديو ده

    ممكن لو كنت دخلت لاحمد شريف كنت هقوله كلام تانى خاااالص .. لكن بما انك اللى نزلت الفيديو ده

    فاحب اقولك .. كلنا لون واحد
    مش شرط لون الاخوان ... والاخوان مش بيجبروا حد انه يبقى فى لونهم

    بس كلنا مصريين .. لونا واحد .. وارضنا واحده
    بلاااااش بالله عليكم نبقى فتح وحماس

    ReplyDelete
  13. انا كنت نزلت التعليق بتاعى قبل ما منعم ينزل التوضيح بتاعه

    لكن على العموم خير ... بص يا استاذنا

    اكيد للاخوان دور لا ينكر .. واه احنا بنوصل لكل الشرائح فى المجتمع
    ولكن
    وصولنا ده بيبقى متغير الحجم
    بمعنى اننا ممكن نوصل بنسب نتفاوته
    وده اللى بيخلى ان فيه فنانين محترمين واعمالهم الفنية كويسة وهادفه
    ده لانهم كويسين فى نفسهم .. وانهم وصلهم فكر الاخوان

    هتلاقى كمان فئة الاغنيتء الملتزمة اللىاحنا وصللنالها وتداخلنا فيها وفئة تانية التزامها مش قوى او التزامها اسبور


    لكن فى النهاية احب اقول احنا برضة لون واحد .. لون مصر بكل احزابه وطوائفه

    ReplyDelete
  14. بداية يا استاذ منعم. مافيش مشكله من وضع الفيديو . بس تعليقى اولا على التعليقات اللى مافيش حد منها قال وجهة نظره . كل واحد قعد يتفزلكلى . ليه حاطيطو . وقصدك ايه . وعايز ايه.. يا راجل دى ناس فاقده القدره على الحوار اساسا. امال عايزين يقنعوا مين بايه ؟ قاعدين فالقينا اخوان اخوان . اومال كان مين منهم كان بيزور مين ويباركو من يومين ؟ حد يفكرنى كده ؟
    Dmagh Ray7a

    ReplyDelete
  15. أهلا منعم. أهلا شباب

    إجابة سريعة على واحد من أسئلتك السريعة: لأ، الإخوان لا يصلون لكافة شرائح المجتمع، و هؤلاء منهم مسلمين و غير مسلمين. أنا مثلا لا أعرف بالتحديد ما هو دور الإخوان كحركة إصلاحية في كافة المجالات.

    طبعا أنا فاهم أن الإخوان ليسوا لونا واحدا، لكن هذا لا يعني أنهم يمثلوا كل الألوان، ربما كثير من درجات اللون البني مثلا، لكن بالتأكيد ليس الأحمر و لا الأخضر و لا الأزرق.

    ReplyDelete
  16. أولاً الفيديو ده فنى جداً جداً
    وأكثر من ممتاز من وجهة نظرى الفنية
    ------------------------------
    أما اللى فيه

    للأسف ناس كتير بعتقد أننا عاوزين الناس كلها إخوان
    وممكن كمان تزيد وتقول عاوزين الناس كلها صحابة :-)

    وانا شايف أن إحنا السبب
    أو على الأقل لازم نقول لنفسنا إن إحنا السبب

    والفيديو ده فكرته الإساسية كده

    وكأن الإخوان عاوزين عادل إمام يبقى أخ

    وروبى تبقى أخت

    ولو فهمونا صح وإحنا الغلطانين أنهم مفهموناش

    أنا عاوز المبدع عادل إمام وأنا باقول المبدع لأنه فنان بجد

    عاوزه فنان زى أحمد زكى مش فى فنه لكن فى تعامله مع الفن

    فنان كبيييير وأعماله بتخدم أفكار أما عادل إمام فمش عارف ومع ذلك بحب عادل إمام وممكن أتفرج عليه بتحفظ

    بس أنت مقولتلناش رؤيتك :-)

    ReplyDelete
  17. أحيي أحمد شريف على ذكائه فرغم أن أغلب التعليقات تفادت الاجابة عن السؤال المطروح لكن تعليق علاء و تعليق المجهول المذعور من اللي بيقولوا هاي لوحدهم كافيين لرؤية طيف المواقف الاسلامية (مش هقول اخوانية فأنا غير قادر على تحديد انتماء المجهول).

    رغم عقلانية تعليق علاء، لكن خوفي أن الأغلبية مقتنعة ان الأخوان لازم يخلصوا المجتمع من البنات اللي بتقول هاي و مستعدين يتناقشوا في أساليب تحقيق ده. بما فيها درجات مختلفة من القمع و التدخل في الحريات.

    ReplyDelete
  18. يبدوا ان حضرتك لازم توضح كل كلمة مش كل تدوينة
    يلا هنقول ايه كله في ميزان حسناتك يااستاذنا
    نيجي بقي للفيديو
    صراحة مش اشتغل عندي يبدوا والله اعلم عيب ويندوز والله المستعان


    نجي بقي للاسئلة

    هل احنا فعلا بنوصل للمجتمع بكل شرائحه


    في بعض الاوقات بنوصل كتير يعني
    مثلا زي الانتخابات
    واظن ان الفترة الاخيرة باحداثها الهزلية وصلتنا لشرائح كتير
    ومع ذلك ففكر الاخوان نفسه لايصل
    لناس كتير
    يعني الناس عارفه مين الاخوان ومرشدهم مين؟
    وكده
    ولكن منهجهم ايه وعوزين ايه مش كل الشرائح وصلها
    ودا من وجهة نظري
    طبعا يعني




    ايه اللي بيوصل المجتمع مننا
    اخبارنا
    وفي بعض الاحيان كتابتنا
    ومنهجنا وافكارنا بس مش لكل المجتمع



    هل احنا بنجبر حد علي أن يصبغ بصغتنا الاسلامية

    من وجهة نظري لا

    ReplyDelete
  19. اولا الفيديو بالنسبة جميل
    وانا مش مع اللى بيقول مينزلشوليه عرضته
    ايه المشكلة من عرضة
    المفروض نفشوف وجهات النظر الاخرى ونعرف ازاى بيفكروا ويتعاملوا
    ماهو البعد دا والتعصب هو اللى جايبنا ورا
    -
    -
    وبعدين الاخوان
    مش بيصلوا اللى عامة الناس
    هم محصورين فى مجتمعهم وبس
    واذا وصلوا الى اى حد
    بيوصلوا بصورة مش لطيفة
    -
    فعلا الاخوان مش عايزين يشوفوا غير نفسهم وبس
    -
    انت كل اللى عليكم تغيروا باحسنى وتنصحوا وتقولوا
    الى عايز يسمعك اهلا وسهلا
    اللى مش عايز بلاش
    -
    انك لا تهدى من احببت والله يهدى من يشاء
    من شاء منكم فليؤمن ومن شاء فاليكفر
    تحياتى لكل الاراء

    ReplyDelete
  20. ايه يا عم حمي انا مش معاهم دي هي بقت كدة ولا ايه يا عم احمد شريف
    عاوزها علمانية
    طب احنا مش عاوزين وانا مش معااكم

    ReplyDelete
  21. عبد الجوادJune 30, 2007 at 8:06 AM

    منعم ... السلام عليكم
    اولا : بخصوص الفيديو فكرته جيده ومهم جدا نستوعبها ولكن لي ملاحظتين :
    1- هو لم يجمع اطياف المجتمع بتوازناته ، اقصد المجتمع ليس عادل امام وروبي واذا كان يقصد الفن والفنانين فلماذا هذين الفنانين وفقط او لماذا روبي تحديد هل لانها مثالا للفن المبتذل ولماذا عادل امام هل لمواقفه المعروفة من الاسلام والاسلاميين اما باقى الاطياف التي وضعها في الفيديو فهي بالفعل تعبر عن المجتمع ونحن بالفعل في حاجة ماسة لان نصل اليها
    2- من قال اننا كاخوان نريد ان نصبغ المجتمع بلون الاخوان

    نحن نحب ونهدف بان نصبغ المجتمع بصبغة الاسلام باحكام الاسلام وشرائعه ومنهجه ويتوافق هذا مع كل مسلم مصري غيور علي دينه
    فلسنا مع ما يخالف الاسلام وشرائعه
    مع اعتبار كل الحقوق والحريات فلكم دينكم ولي دين
    ولا اكراه في الدين
    الست مع يا صاحبي انه من واجبنا ان ننداي بصبغ المجتمع المصري بهذه الصبغة الطاهرة النقيه
    ولن نتمكن من ذلك الا بوصولنا الي كل المجتمع باطيافه وخاطبناه كل بما يناسبه بمراعتنا لكل اساليب وادوات التواصل مع المجتمع
    واتمنى ان توصل رسالة خاصة جدا للاستاذ احمد شريف
    طمأنه اننا الاخوان نحب كل الناس ونحب وطننا مثله فنحن ايضا كل الناس ونحن ايضل كل المجتمع ومنه
    ولا نريد ولا نطمع في ان يكون كل الناس اخوان
    نحن نحب ان يكون كل مسلم مسلم بحق
    نحن ان نعيش في مجتمع طاهر نقي يراعي اداب واخلاقيات الاسلام ويطبق شرائعه والتي تنناسب كل وقت وزمان ومكان
    وفي الختام ذكره اننا اخوان ونشرف بان نكون اخوان ولا نفخر بان نكون بجانب روبي ولا امام
    ليس لاننا لا نحبهم لا فالموضوع ليس حب يا منعم
    الموضوع .... الاسلام
    وانا اخوان

    ReplyDelete
  22. الناس اللى بتهاجم منعم عشان حط الفيديو لازم يخفو الضغط عليه شويا الراجل بيقصد اننا نستمع لكل الاراء ونتناقش حولها .. وعلى فكرة انا مش من الاخوان بس كان يهمنى ردهم على اللى قاله شريف ولازم ناخد بالنا ايه اللى ممكن يحصل لو الاخوان حكموا مصر واذاى هيحلو كل المشاكل دى خصوصا وحنا شوفنا غزه الان تحكم من الاخوان .. وانا بستبشر خير بردو بس يارب منوصلش لاننا نخصر كل حاجا وساعتها لاهاتلاقى لا فى امن ولا حتى اكل بردو ذى فلسطين وغزة واللى حصل فى الصومال وافغانستان

    ReplyDelete
  23. انا مش متفقة مع وجهة النظر اللى بتوضحها الفيديو
    الاخوان عايز يحكم بالاسلام والاسلام منهج حياة

    و الاسلام دين شامل يهتم بكل الناس على اختلاف اطيافهم

    فمثلا صورة روبي هيا لا تقدم فن هادف لكن هي بتقدم فن يثير الغرائز و معندهاش هدف عايزة توصله للناس من خلال هدفها

    فمفيش اى نظام سواء كان اخوان أو غيره او اى مجتمع ينفع يشجع واحدة زى روبي

    الاسلام بيهتم بالفن و لكن في اطاره الصحيح الهادف اللى بيساهم في بناء المجتمع

    و الاسلام دين يهتم بالمسيحين ويحترم ديانتهم و ابسط مثال عند فتح عمر بن الخطاب بيت المقدس و العهد العمرية اللى فيها جزء ألا تضار كنائسهم

    و بم ان الاخوان شعارهم ان تقوم دولة ذات مرجعية اسلامية
    فدى حاجة كويسة جدا

    ReplyDelete
  24. انا غير راضى تمام عن الموضوع ده
    اناشدك اخى انك تشيله
    السلام عليكم

    ReplyDelete
  25. يشيله؟

    طيب واحمد شريف يشيله هو كمان؟

    ReplyDelete
  26. مش تمام خالص يا منعم

    منعم

    بجد

    إوعى تنسى مرجعيتك

    منعم

    خد بالك من نفسك كويس

    ReplyDelete
  27. معلش نسيت أجاوب على السؤال بتاع هل نصل إلى جميع شرائح المجتمع ؟

    بصراحة ، للأسف لأ لأننا ببساطة لا نملك من أدوات الوصول للمجتمع صوى أداة الوصول المباشر وجهاً لوجه
    من شخص إلى شخص

    فلا يصل للناس منا إلا أخبارنا
    سواء بأيدينا
    أو بأيدى ضدنا المشوهة

    ولكن فكرنا لا نمتلك من وسائل الإعلام والدعاية ما نستطيع به الوصول للمجتمع كافة

    ReplyDelete
  28. طيب الفديو بيعبر عن وجهة نظر صاحبه والاهم مناقشة موضوعه لا اشخاصه بعدين نبقي نشوف اسئلة منعم

    الحياه مش ابيض واسود هي متعددة اللوان والاطياف ده شئ فطري وبالتالي لم نجد في الكون منذ عرفناه الا انماطا واللوانا مختلفه وهي سنه كونية ماضية ابد الابدي ده ممكن يكون اتفاقي مع موضوع الفيديو

    لكن ...هناك من الالوان ملا يتسم معي وارفضه تماما ولاارغب به لانه نمط هدام لا بناء ولا يتوافق مع رؤيتي انا لم اجبره باي شكل من الاشكال علي الاختفاء ولكن من حقي الا تجبرني انت عليه وتفرضه علي من منطلق انه طيف مجتمعي انا مع وفي صف كل طيف ولون بناء جاد وارفض ولا اكون مع كل طيف اراه يهدم خلقي وبلدي ونفسي ان كنت انت تراه طيف فانا لا اراه طيف فلا يجبر احدنا الاخر وليبدي كلا رايه والحق احق ان يتبع

    اسئلة يا استاذ منعم

    هل نحن نصل لكل شرائح المجتمع..؟

    الاجابه ان ذلك هدف من الاهداف خلال الاعمال قد يدرك وقد لا ولكن حتي الان لم يحقق بصورة مقنعه ويحتاج الي كثير من الابداع في التعامل معه لتحقيقه ولكن هناك شرائح يتم الوصول اليها ولكنها غير كافيه ولسنا هنا بصدد التحدث عن الاسباب واساليب علاجها

    ايه اللي بيوصل المجتمع مننا..؟

    الاخوان بيشتغلوا في كذا ناحيه مش مكان واحد ومش بطريقه واحد الي بيوصل مختلف وكتير بيكون مش الي مطلوب توصيله الاسباب كتيره لكن الي بيوصل للناس قليل و قليل من يصل اليه المراد

    هل احنا بنجبر حد علي أن يصبغ بصغتنا الاسلامية...؟

    انا لا اري ذلك مطلقا ونري كلام البنا نفسه عن انماط الاناس من الاخوان



    مؤمن

    إما شخص آمن بدعوتنا و صدق بقولنا و أعجب بمبادئنا ، و رأى فيها خيرا اطمأنت إليه نفسه ، و سكن له فؤاده ، فهذا ندعوه أن يبادر بالانضمام
    إلينا و العمل معنا

    متردد :
    وإما شخص لم يستبين وجه الحق ، و لم يتعرف في قولنا معنى الإخلاص و الفائدة ، فهذا نترآه لتردده و نوصيه بأن يتصل بنا عن آثب ، و يقرأ
    عنا من قريب أو بعيد ، و يطالع آتاباتنا و يزور أنديتنا و يتعرف إلى إخواننا ، فسيطمئن بعد ذلك لنا إن شاء الله

    نفعي :
    وإما شخص لا يريد أن يبذل معونته إلا إذا عرف ما يعود عليه من فائدة و ما يجره هذا البذل له من مغنم فنقول له : حنانيك ليس عندنا من جزاء إلا
    ثواب الله إن أخلصت ، و الجنة إن علم فيك خيرا ، أما نحن فمغمورون جاها فقراء مالا ، شأننا التضحية بما معنا و بذل ما في أيدينا ، و رجاؤنا
    رضوان الله سبحانه و تعالى و هو نعم المولى و نعم النصير

    متحامل :
    و إما شخص أساء فينا ظنه و أحاطت بنا شكوآه ، فهو لا يرانا إلا بالمنظار الأسود القاتم ، و لا يتحدث عنا إلا بلسان المتحرج المتشكك ، و يأبى إلا
    أن يلج في غروره و يسدر في شكوآه و يظل مع أوهامه ، فهذا ندعو الله لنا و له أن يرينا الحق حقا و يرزقنا اتباعه و الباطل باطلا و يرزقنا اجتنابه
    و أن يلهمنا و إياه الرشد

    وخلاص
    ده الي كنت عايز اقوله

    ReplyDelete
  29. اولا انا محمد من كش ملك.


    كدة الكلام اختلف .. عشان كدة انا كنت عاوزك تعبر عن رايك عشان محدش يفهمك غلط ..


    انا هجاوب على الاسئلة بس انا شايف انها شخصية اوى يعنى مكن بعض الاخوة بيحولوا انهم يوصلوا لكل فئات المجتمع وناس تانية من الاخوة شايفين ان الناس دول مش لازم نوصلهم لانهم كذا وكذا ..

    بغض النظر انا اجابتى هتبقه على رأى فقط



    هل احنا فعلا بنوصل للمجتمع بكل شرائحه؟



    انا عموما بتعامل مع كل الجهات وده شوفتة فى الوقت الاخير من أغلبية الاخوة ممكن عشان احنا بيكون افكارنا ذى بعض شوية بس انا شايف اننا بنوصل للطبقات دى وده هدفنا لدرجة اننا بنحضر اجتماعات الاحزاب التانية عشان نفهم أرائهم وازاى نقيم الحجج والبراهين وايضا هناك من فى الوسسط الفنى على رغم وجودة فى الوسط الفنى بيحاول انه يصلح ..

    يعنى الملخص ان الفاعلية تتوقف على الشخص فقط ولكن إذا أخذنا نسبة فى هذة الحالة ساقول ان الاغلبية الاكبر من الاخوة منفتحة وبتوصل افكارها للمجتماعات دى.







    ايه اللي بيوصل المجتمع مننا

    الصبغة الاسلامية بغض النظر عن دخولهم الاخوان ليس هدفنا انتماء هؤلاء الناس اللى الاخوان ولكن هدفنا ان يرجعوا الى الاساس لديهم وهو الشريعة



    هل احنا بنجبر حد علي أن يصبغ بصغتنا الاسلامية


    انا مش هكذب على حضرتك فى بعض الاخوة فعلا بيعملوا كدة وانا بقف ضدهم فى هذة الحالة لأنى هقول نفس الكلام مش هدفنا دخولهم الاخوان ولكن هدفنا تطبيقهم الشريعة كما امر الله



    وجزاك الله خير

    ReplyDelete
  30. ياريت تقولوا صبغة إخوانية، وسيبوا الإسلامية لتعددها طوال تاريخها. أنتوا، الكوادر موش قياداتكم، ليكم فهمكم للدين غير ملايين غيركم، اما القيادات.. فموضوع تاني.
    عمر مصر ما تنفع إخوانية إلا في ظل أوجاع الفقر وإستغلال جهل الناس.

    ReplyDelete
  31. يا جماعة عيب كده مش كل واحد يدخل يعلق يكون ماسك فى ايده سكينة لعبد المنعم احنا اسفين يا استاذ منعم الظاهر ان الناس لازم تتعلم ادب الاختلاف من جديد

    ReplyDelete
  32. طارق القاضىJune 30, 2007 at 6:26 PM

    أنا نفسي الأستاذ أحمد شريف يفهم أن ده كلام جميل ومقتنعين بيه لكن النظام يريد أن يبقى على كل الألوان ألا لون الأخوان يريد أن يقصيه عن الدنيا ولو قدر عن الأخرة المشكلة الكبيرة أن الناس لا تريد أن تفهم أن الأهم فالمهم فالأخوان المحاصرين من أنظمة العالم بأكمله كيف يستقيم أن نتهمم بأنهم يريدوا أن يفرضوا رأيهم علي الجميع فهذا نفس المنطق الذى تحدث به د.ميلاد حنا أذا وصل الأخوان ألى الحكم سأترك البلد فيا أستاذ أحمد دعنا نواجه أولا الهم الكبير الذى يجثم علي صدورنا ثم نلتفت سويا لسلبيات الأخوان وأذا أردت أن تنتقد الأخوان في أى موضوع فأرجو أن تعقد مقارنة بينه وبين الحزب الوطنى اما بالنسبة لعادل أمام فأنا لا أحترمه ولا أحبه فكيف أحترم شخص أيد وبارك قتل عشرات اللاجئين السودانيين أما روبي فربنا يكون في عونها هتلاقيها منين ولا منين

    ReplyDelete
  33. السلام عليكم ورحمة الله




    بالراحه بقى كده نتكلم في الموضوع

    أولا

    انا سعيدة جدا بالكليب ده جداااااااااااااااااااااااااا
    رغم اختلافي التام مع اللي فيه لكن فرحانه بيه اوي لاننا هنستفيد منه جدا كلنا اخوان وغير اخوان

    و ربنا يكرم أخينا عبد المنعم لانه حطه في المدونه وده ان دل عن شيء يدل على خطأ وجهة النظر المعروضه في الكليب
    وهنوضح كل حاجه بالراحه

    أخونا أحمد شريف

    بنحترمك ونحبك في الله والنون دي مش علشان انا بحراويه وكلامنا كده لا دي نون الجمع يعني اقصد كلنا كاخوان يعني
    اه كلنا مش بتكلم باسم كل واحد لوحده لكن بتكلم عن الفئة العامة
    من حق حضرتك تعرض وجهة نظرك
    من حقك تختلف معانا
    وكمان بحترم في حضرتك جدا انك بعت الكليب ده في المكان ده بالذات اللي بيحمل اسم بيعبر عن هوية وهوية صاحبة بل واتجاه معظم ضيوف وزوار المكان
    ولو حضرتك مكنتش انسان قادر على الحوار فعلا كنت حطيته في مكان اخر بيهاجم الاخوان وتناولته بشكل ساخر مفهوش نقد بناء لان اصلا مفهوش تبادل اراء وكان هيبقى غايب فيه رد الطرف الاخر
    لكن حضرتك بجد حد شجاع علشان تبعت الكليب ده علشان يتحط هنا على الرغم انك اكييييييييد كنت متوقع هجوم كبير
    لكن للاسف حضرتك شايف اللي ناس كتير شايفينه من ان الاخوان بيفرضوا دعوتهم على الناس وكلام من ده واننا عايزين نلون المجتمع بلون الاخوان فقط ولا غير ومفيش مساحه لالوان تانيه ولا حتى لاي تغيير في درجة لون الاخوان ولا في مقلم ولا مخطط ولا منقوش وكله عندنا ساده

    للاسف فكرتك دي عند ناس كتير ولها اسباب كتير جدا

    منها الصوره اللي الاعلام مــــصر يوصلها للناس عن الاخوان
    حتى في الاعمال الدراميه ومش بس الاخوان بل الحركات الاسلاميه ككل واهمها اعمال "عادل امام" اللي يعتبر دكتوراه للتريقه على الحركات الاسلاميه ايا كانت وايا كانت اتجاهاتها و دايما في اعماله الاوراق مخلوطه بين كل الحركات الاسلاميه وبعضها وده اساس اختلافي الشخصي مع نوعية اعماله ناهيك بقى عن كمية الاباحه والعري اللي في اعماله بس مع ذلك هو بيدحكني لكن لو الضحكه هتيجي بالطريقه دي ..الله الغني عنها

    انما روبي بالمناسبه مش بشوف فيها حاجه تستاهل انها تبقى فنانه لكن لو حضرتك بتحبها ده رايك لكن اكييييييد حضرتك عارف راي الدين في مجرد الفرجه عليها وحضرتك عارف هي بتطلع ازاي على التليفزيون وشريف صبري موظفها لايه
    هو ده بقى اللي بيعملوه الاخوان
    يوصلوا الخطاب الديني و لكم ماشئتم
    هو سيدنا رسول الله مش كان كل همه يوصل رسالته وحارب و هاجر و اتبهدل في سبيل توصيل الرساله انما لم يجبر احدا على اعتناق الاسلام و كان يغضب من المسلم الذي يرتكب معصيه بل ويحمر وجهه لذلك احيانا ولكن مضربش حد على ايده علشان طاعه ومحدش بيطيع ربنا الا حبا لله وليس جبرا من احد
    وده اللي انا كبنت من الاخوان مؤمنه بيه
    وهي دي الدعوه اللي فهمتها من رسائل الامام البنا

    ليا بقى اعتراض على طريقة المزج في الكليب
    ينفع حضرتك تقول انا بحب في النحات ده صبره
    وفي الراجل ده فنه
    وفي منعم شجاعته وحريته
    انما متقولش انا ده وده وده
    لانك لو ده مش هتبقى ده لانه مينفعش فالمباديء لا تتجزأ واللي شايل جواه افكار شخص فيهم مينفعش يشيل افكار التاني والا كان بقى زيه وواضح الاختلاف الجذري بين المتناقضات اللي حضرتك حطيتها في الكليب

    ومينفعش تحط المتناقضات دي علشان ترضي كل اللي بيتفرج عليه لانه مزج صراحة بلا طعم و بيعاملنا على اننا سذج

    ReplyDelete
  34. وللحديث بقيه مع موقف الاخ منعم و مع اجابات الاسئله دي ويارب تبقى بداية حوار جاد لكن الوقت مش مساعدني دلوقت

    ReplyDelete
  35. أولاً الفيديو فنياً راقى جداً جداً
    من ناحية الفكره والموسيقى التصويريه
    وأشكرك يا أحمد بيه شريف وعلى فكره الإسم ده شكل إسم للعظمـاء فقط ومنعم هيفهمنى ..
    النقطه التانيه :-
    إن الإخوان يا أحمد غير ماتسوق
    إحنـا فاهمين كويس إن مصر تشكيلة من أعراق وأعراف وأشكال وألوان
    وده واضح جداً فى فكر الإخوان وتراثهم
    يعنى علاقه البناء بالهضيبى الأب وعلاقته بمكرم عبيد وتنسيق الإخوان مع الوفد فى التشريعيه قبل عشرات السنين ومرشح الأقباط الفائز على قائمة الإخوان من عشرات السنين
    ياعم احمـد
    الإخوان هم محمد عبدالقدوس بإبتسامته وسعه صدره
    الإخوان المسلمون هم منعم بإنفتاحه وجديته ووقفته مع الكل
    الإخوان هم عبدالمنعم أبو الفتوح بجدعنته وعطائه
    الإخوان المسلمون هم وزير قبطى للسياحه فى حكومه حماس الإسلاميه
    الإخوان هم مستشار سياسى قبطى لمكتب الأإرشـاد
    الإخوان هم مرشحه من النساء على قائمتهم المعلنه فى النيابيه الماضيه واللى قبلها
    الإخوان المسلمون هم عصام العريان بتقديره للجميع وتوقيره للكبير والصغير
    الإخوان المسلمون هم يوسف القرضاوى بحواره مع الجميع وبحثه عن التوافق والوحده
    يا أحمد إحنا مش دعاة فتنه إحنـا دعاة حوار
    يا أحمد إحنـا مش لصوص سلطه إحنـا أصحـاب مشروع إصلاح
    أحلف لك يعنى علشـان تصدق .....ههههه
    ثالثاً
    يا شباب الإخوان أبوس إيديكم بلاش تشنجات وإهدوا علشان تقدروا تفهموا لوحدكم وتقدروا تحكموا على الأمور بشكل مستقيم و متزن
    ياشباب الإخوان "ماجعل الرفق فى شئ إلا زانـه"

    ReplyDelete
  36. اولااااا شكرااعلى احترامك لوجهة نظر راسل الفديو

    وثانيااا احنا بنحترم حرية الراى والتعبير ولكن فى حدود لا يمكن تخطيها

    مش هينفع تحتلنى واحترم رائيك فى الحرب


    ثالثا ما اوضحه الفديو هو حال الواقع وتكوينة من العديد من الاطياف والاشكال .. وهو واقع

    ولكن هناك نهاية لتتحد كل اطياف المجتمع على الدستور العظيم
    دستور كل زمان ومكان


    اما عن وصول الاخوان لجميع طبقات المجتمع
    فهو ايضا واقع ولاكن يمكن ان يكون بنسبة قليلة فى بعض الطبقات

    ولكن وفى النهاية فهى دعوة الاسلام
    بعد ان تجدد شبابها

    وفى الختام فسنستمر فى الدفاع عن اسالامنا وتوصيله لكل البشر ولكن ليسة فى ايدينا الصلته لاجبار احد عليه
    وهذا من عظمة الاسلام

    ReplyDelete
  37. أولا بالنسبة للفيديو فهو كليب رائع جدا وأتفق مع أغلب ما جاء، نعم هذه هي مصر : الفتاة المنقبة وفتاة ال"هاي" ، الممتدين والعلماني،المعتدل والمتطرف، المسلم والمسيحي والملحد...الخ
    هكذا كانت مصر دائما وهكذا ينبغي أن تكون ، مجتمع قائما على التعددية والتنوع لا مجتمعا أحاديا في التفكير والتصرق والمظهر كما يريد له البعض
    ثانيا: فكرة اللون ورغم وجودها في أدبيات الإخوان إلا أنها ليست حكرا عليهم كما يذهب صاحب الكليب بل هي فكرة متداولة بين تيارات وينبغي أن نكون ضد فكرة اللون الواحد أيا كان مصدرها
    الإخوان أو غير الإخوان
    تحياتي

    ReplyDelete
  38. منعم في طريق التخبط :)

    ReplyDelete
  39. دعنا نتفق على اننا لا نجبر احد على الاسلام لانه لا اكراه فى الدين

    و لكن لا يعنى هذا ان ننشر اعماله و افكاره
    بل ننشر نحن افكارنا لاننا على الحق
    لا داعى لاضاعة هويتنا بداعى اللون الواحد و عدم الفرقة و الوحدة الوطنية و خلافه

    ReplyDelete
  40. الاخوة اللي بتتكلم عن الموضوع الشائك ده نصيحة من اخوكم في الله ايه الاسس الشرعية اللي استندتوا عليها انا مش بشكك في كلام حد بس بس احنا لنا مرجعية اسلامية والعمليه انا اسف مش ناقصة تاليف0
    الاخت الفاضلة دعوة الفردوس تعيقك ربنا يحفظك جميل ومتزن بس سامحيني في مشكلة خطيرة
    يعني ايه بنحبك في الله يااحمد شريف انت ليه بتجمعي كده
    من الواضح ان الراجل ده فكره علماني صرف فازاي تقولي كلمة زي دي
    يفترض يااختنا ان فيه في الاسلام حاجة اسمها عقيدة الولاء والبراء وشخص بالفكر ده مينعش اقول له بنحبك في الله علي ايه
    ايه شروط الحب في الله ؟؟؟؟؟؟؟
    قال رسول الله صلي الله عليه وسلم :اوثق عري الايمان الموالة في الله والمعادة في الله والحب في الله والبغض في الله0
    الشخص اللي انا بحبه في الله فهذا علي اساس مواقفه لدين الله وعلاقته بالله
    اخبريني بربك مواقف ايه اللي وقفها لله الاستاذ احمد شريف عشان يتقلوا كده 0
    الاخ الصعيدي
    جزاك الله خيرا لمحاولتك تقريب وجهة نظرنا للاستاذ احمد شريف
    بس انت بتقول الاخوان المسلمين هم فلان وفلان وكلهم ائمتنا وعلمائنا وقادتنا وهم علي اعينا وراسنا لكن مرجعيتنا الاساسية قبل كل هؤلاء القران والسنة واحنا في الاصل جماعة اسلامية
    يبقي كان الواجب تقول الاسلام هو كذا وكذا وكذا مش الاخوان هم كذا وكذا
    وعلي فكرة انا عندي رائ الناس دي خايفة من الدين في حد ذاته مش من الاخوان لان في تطبيق الدين هدم لافكارهم اللي بالفعل مخربة وهو اتباع لهوي ومزاج وشهوات
    هو راح قرا لكل من هب ودب من المفكرين الغربين وخد رايهم في كل حاجة يبقي كان من الاولي انه يقرا عن الاسلام والله لوجد ان الاسلام افضل مما قرا ثم اعتقد0
    وبعدين لوكان قرا عن الاخوان وفكرهم من كتب الاخوان كان هيعرف راينا بجد مش الافلام بتاعت لون واحد وستين لون0
    افتكروا يااخواني ان من اسس الدعوة الي الله هي محاربة الافكار دي ومن اسس الدعوة الي الله انك تتمني ان كل هؤلاء يصبحوا اصحاب مبادئ اسلامية مش قهرا ولا حاجة بس لازم تدعوه لها
    ومن اساس الدعوة الي الله انك تحاول تدعو كل اصحاب الاديان الاخري الي دينك بل هذا هو الاساس قبل الحوار معهم
    بل انك تتحاور معهم من اجل هذا الهدف0
    وجزاكم الله خيرا وسامحوني فهذا يجب ان يكون عهدنا لبعض ننصح لبعضنا فالمؤمنون بعضهم اولياء يامرون بالمعروف وينهون عن المنكر0
    عز

    ReplyDelete
  41. مش لازم المجتمع كله يتلون بلون الاخوان

    المهم انه يتلون بلون الاسلام

    اللى ممكن يستوعب الجميع
    حتى اللى مش مسلمين

    ReplyDelete
  42. انا اخوان وبحب تمثيل عادل امام بس بالامانه بحس ان روبى غلسه جدا وبعدين انا شايف ان احمد شريف اخوان بالصميم اهنييه على فكرة الكليب حاتم ثابت اخوان مسلمين

    ReplyDelete
  43. بسم الله الرحمن الرحيم

    احترمك جدا لنشرك لهذا الفيديو يا عبد المنعم ...
    طبعا أريد ان اعلق على هذا المقطع فأقول ... هناك فرق كبير ان ان تكون ذلك الانسان او ان تتعايش نعه ... وبشكل اوضح.... انا لست تلك المطربة او ربما لست ذلك الاخوان ... ولكن في النهاية انا لي شخصية وتوجه ومبادئ اسير وفقها بل واحاول اقناع الناس بها .... إذا فأنا أتعايش مع الكل ... ربما أحارب أفكارا بعينها أرى أنها تضر بالبلاد والامة من وجهة نظري لكني لا أحارب شخوصا بعينها فأنا متعايش مع كل هؤلاء في ظل دعوتي لهم باعتناق ما أقتنع أيا كان اقتناعي ودون اجبار او قهر ... ولكني أبدا لست هم ... فكل منا شيء فريد لم يحصل مثله قبل اليوم ... كن أنت ولا تكن غير نفسك ... تستطيع ان تصل الى كل المجتمع بكل فئاته بشخصيتك ومبادئك ودون اعتداء على احد ...

    ان احسنت فمن الله وان اسأت فمن نفسي ومن الشيطان

    محمد سلامة
    الاردن

    ReplyDelete
  44. الفيديو ده وتعليقات الاخوة عليه خلونى اسأل نفسى يعنى ايه إخوان مسلمين ؟
    معنى ان انتم إخوان مسلمين إن أنا مش مسلم
    طب ازاى
    والله العظيم أنا مسلم وأشهد أن لا إله إلا الله وأن محمد (عليه الصلاة والسلام ) رسول الله
    واصلى وأصوم و و و
    يعنى ايه اللى ناقصنى ؟
    حد يقوللى

    ReplyDelete
  45. 0السلام عليكم ورحمة الله
    انا الصراحه مكنتش ناويه ارجع للموضوع تاني الا في اجابات الاسئله اللي طرحها اخونا منعم لان ده الحوار اللي بقى لازم يتفتح فعلا
    انما موضوع الكليب انا ادليت بدلوي فيه خلاص

    لكن في اخ كان اتكلم عن الحب في الله
    يااخي مش معنى اني اختلف مع اخويا اني اكرهه وان كان التحفظ على مسمى الحب في الله فانا مقدرش اقول غير كده لان حضرتك مؤمن بقضيه ومؤمن بانك لازم تاخد بايد الناس اللي حضرتك مشفق عليها من الذنوب ونار جهنم والعياذ بالله وده لان حضرتك بتحبهم ..ايوه بتحبهم ولو مش بتحبهم مكانش فرق معاك ومكنتش هتاخد طريق الدعوه الى الله و تتعرض لكتييير من المواقف المحرجه اللي مفيش حد فينا مش بيتعرضلها وهو بياخد بايد حد او وهو بيكلم حد في طاعه و ينهيه عن معصيه
    علشان احنا بنحبهم بنخاف عليهم و ناخد بايديهم
    انما بالنسبه للحديث فطبعا اي حد بيطيع ربنا ده بحبه في الله وبحترمه واتعلم منه ايا كان حتى لو باختلف معاه
    لكن مش معنى كده اني اكره حد
    والا كان رسول الله كره الصحابي اللي راح قاله زنيت يارسول الله
    او كره المراه اللي زنت او او او
    انما لو مفيش حب محدش هيتقبل منك كلام
    ولو هتكون مؤثر ولا بتغير في حد
    ومش معنى اني بقول بحبه في الله
    اني معاه في اللي قاله
    ابداااااااااااااااااا
    وبكرر اعتراضي الشديد على الكليب
    للاسباب اللي ذكرتها
    والبغض في الله مش بالمعنى اللي احنا بقينا فاهمينه دلوقت
    يااخي انا بقابل اخوات يقولولي بتقفي مع واحده حاطه مكياج؟؟ازاي ده انتي اخت
    انتي بتكلمي واحده بتختلط؟
    انتي اتجننتي
    وميبقوش طايقين البنت وهي رايحه عليهم
    لكن مش هي الدعوه اللي انا فهمتها
    ومش ده اللي هيصلح الناس اوي ياخد باديهم
    انا بشوف في الناس دي خير لكن محتاج اللي يوجهه صح
    وكل الناس دي فطرتها طيبه لكن عايزين اللي ياخد بايدهم ويفَهِمهُم ويفهَمهم ويتدرج معاهم
    واعتقد ان محدش بياثر في حد الا لو حبه
    وانا كبنت ممكن في واحده تكون بتعمل ذنوب ومتبرجه مثلا لكن لها مكانه في قلبي وده مش بايدي القلوب جنود مجنده ..فدي انا بحبها وعلشان بحبها مش بتخيل منها اه واحده في الدنيا مابالك الاه في جهنم والعياذ بالله شكلها ايه
    واخونا احمد شريف
    عنده جوانب كويسه بالتاكيد
    واللي واضحلي منها جراته و ايجابيته وعلشان كده انا مش بكرهه ومينفعش اقول غير بحبه في الله منعا لسوء الظن

    ReplyDelete
  46. أخونا اللي بيسال عن اللي ناقصه وليه مسمى اخوان مسلمين

    اولا انا هتكلم عن وجهة نظري الشخصيه

    نحسب ان حضرتك على خير
    وربنا يكرمك ولا يعلم احد من هو عند الله افضل

    ولكن الاسلام مش تاديه عبادات وبس زي مانا فاهمه وزي مابتعلم من الاخوان برده ولكن الاسلام ان تكون ايجابيا وان تقف للحق في وجه الباطل وايات القران اللي بتتحدث عن الايجابيين واللي حملوا دعوة ربنا من الرسل وهم كثيرون منهم الرجل اللي راح قال لسيدنا موسى ان القوم يأتمرون عليه
    وموقف الرجل اللي ذكر في سورة يس فهو لم يكن مكلف بالدعوه وليس نبيا ولكن تبين له الحق فكان لزاما عليه ان يدعو اليه
    وموقف اهل الكهف
    مواقف كثير تانيه

    لذا فالهدف هو الدعوه الى الله

    وليه مسمى الاخوان
    هقول لحضرتك شيء بسيط لان مفيش وقت بجد
    اولا كلمة اخوان لان الدعوة دي قائمه على الاخوه والحب في الله وفعلا لما بشوف سلبيات فينا او مشاكل بيشفع للناس دي عندي حرصها على الاخوه فعلا وده لان ديننا امرنا بكده"كونوا عباد الله اخوانا"ده جزء من حديث للرسول
    وكذلك يقول عز وجل"واعتصموا بحبل الله جميعا ولا تفرقوا واذكروا نعمة الله عليكم اذ كنتم اعداءا فالف بين قلوبكم فاصبحتم بنعمته اخوانا"
    اليس هذا امر بالترابط والتاخي ؟؟
    لذا فقامت الدعوه على مفهوم الاخوه وهذا مادعى اليه الامام البنا
    ومسلمين دي بقى لاننا مسلمين ولله الحمد

    و كون اننا في جماعه لان ده بيكون عون للانسان على الطاعه لما بيبقى في صحبه صالحه بتاخد بايد الانسان للافضل وتكون جنبه عندما يخطيء والشيطان للفرد اقرب منه الى الاثنين

    يارب اكون قدرت اجاوب ولو باختصار وعدم ترتيب افكار ولكن عذرا فالوقت متاخر جدا و عايزه انام جداااااا

    ReplyDelete
  47. طبعا هو الفيديو عليه تعليقات كتير أهمها إن صانعو وضع الإخوان جزء من المجتمع زي المليشيات في أمريكا كده وطبعا ده ملوش أساس من الواقع اللي بيأكد إن الإخوان "فكر" مش أفراد والفكر ده بيأيدو معظم المجتمع المصري وبيستوعب الجزء الآخر زي جارين واحد مقتنع إن الطماطم خضار والتاني مقتع إن الطماطم فاكهة مع إن الطماطم هيا الطماطم متغيرتش , هوا ده علاقة الإخوان كأفراد بباقي الناس هما ليهم رؤية معينة وناس تانية ليهم رؤية تانية وتالتة ليهم رؤية تالتة وهما دول اللي بيكونو الصورة اللي في الفيديو لإن الطماطم هتفضل زي ما هيا طماطم.
    ملحوظة:إحنا لا بنكره روبي ولا عمرو دياب إحنا بنكره أفعالهم وبنحبهم كأفراد ونتمنلهوم الهداية والإستقامة زي أي إنسان نفسنا إن ربنا ينتشلو من المعصية للهداية

    ReplyDelete
  48. على فكرة انا معاه في جزء وهو مينفعش المجتمع يكون لون واحد لكن قادة المجتمع وغالبيته بالإسلام يكونوا اساتذة الدنيا لأن الإسلام حق ولابد من الإعتزاز به والتيقن عندها ان الله معنا
    لكن اختلف معه في طريقة تفكيره المتناقضة وكأنه يجمع الأحسن من كل شئ لكن اقول له ان انك متناقض جمعت بين عوامل البناء والهدم في آن واحد

    ReplyDelete
  49. امتى هنقول انا غير راضى عن جزءية كذا أو تناول الموضوع من الناحيه كذا
    بلاش نرفض كل الافكار بمجملها
    واحنا لو بقينا كلنا شكل واحد وطريقه واحده ايه الطعم وايه المعنى؟

    ReplyDelete
  50. والله انا شايف ان الفيديو ده كويس جدا واعلاميا نجح في توصيل فكرة صاحبه .. و كفكرة فاحنا بنحترم جميع الأفكار وطرق التفكير ..
    أحمد شاب مصري بيفكر زي ملايين الشباب .. وكلامه عادي جدا مش مستحدث ولا غريب .. يمكن السبب في كده ان الخطاب الديني المعتدل اللي بيمثله الاخوان أبطأ قليلا من متغيرات العصر ..
    فنتيجه لكده شباب كتير اعرف كتير منهم بيفكروا ان الاسلام مينفعش يبقى لون الناس كلها ..
    هاقول مثال بسيط هنا . لحد إمتى كنا بنقول ان صوت المرأة عوره وسايبين روبي وهيفا والبنات دول يمثلوا الفن العربي وكله بيقول همه مش كويسين عشان لا يجوز للمرأة انها تغني في الاسلام وكله شاف الاسلام كده واعتبره ضيق في النقطه دي لأبعد الحدود مع ان الموضوع مش كده خالص.. لما الشيخ القرضاوي إستمع إلى غناء ميس شلش أو إنشادها- سميها زي ما تحب النتيجه واحده - وأجاز ليها إنها تغني لإنها بتحمل رسالة وبتوصل قيمة وبتقدم فن بدأنا نفهم ان المشكله في ان المرأة تطلع تغني ! المشكله في اللي بيتمايعوا وبيصيعوا وفي الآخر مش بيقدموا حاجه وكله تحت مبرر شهير اسمه الفن .. ساعتها رؤية الإسلام وشموليته كانت أقوى من ان البعض يتخيلها من الاخوان اللي كانوا فاكرين ان شمولية الاسلام انك تلعب كوره وتروح تصلي بعدها !
    التغير السريع اللي حصل في المرحلة اللي فاتت والانتقال السريع من مرحلة انغلاق فكري الى مرحلة انفتاح لا محدود خلى كتير من الاخوان نفسهم ما يستوعبوش التغير ده ويشوفوا حاجات كتير على انها مط للدين ليتسع لمتغيرات العصر .. وبالمقابل كتير من الشباب اللي مش اخوان شايفين ان الاسلام مفهوش مكان أساسا لاستيعاب فئات المجتمع كلها بأفكارها و بألوانها .. فاحمد شايف ان الاخوان فكريا ليس لديهم مساحه لاستيعاب روبي وعادل امام ..يمكن كتير من الاخوان ليس لديهم هذه المساحه ولكن الفكر نفسه أوسع بكتير وأكتر مرونه لإنه منبثق من النظام الإسلامي اللي من خصائصه و مميزاته استيعاب جميع الأديان والشعوب ..
    والاسلام لما دخل الاندلس كانت الاندلس دي اوروبيه وكانت تختلف كليا وجزئيا عن ثقافة العرب فنرى فيها الإمام بن حزم بفكره المختلف الى حد بعيد عن غيره من الأئمة اللي نشؤوا في الجزيره العربية والاسلام استوعب شعب الأندلس زي ما هو بحبه للموسيقى وحبه للترف وجميع خصائصه اللي حملها على مدى ملايين السنين بدون أي تصادم مع الثقافه أو الاشخاص او الافكار ..
    وشكرا يا منعم انك أتحتلنا الفرصه دي لمناقشة موضوع زي ده .. الواحد فعلا اكتشف حاجات عجيبه في تفكير بعض الشباب

    ReplyDelete

abdoumonem@gmail.com